ناهید قوبادی

ناهید قوبادی له ساڵی ۱۳۴۳ی هه‌تاوی له شاری بانه‌ی کوردستان له دایکبوو. کارناسی (لیسانس) به‌ڕێوبه‌ری کتێبخانه‌ی له زانکۆی تاران تەواوکرد و پیشه‌ی ده‌رهێنه‌ری سینەمای له ساڵی ۱۳۸۱ی هه‌تاوی به شێوازی ئه‌زموونی ده‌ستپێکرد. ناهید قوبادی له ساڵی ۱۳۸۳ی هه‌تاوی له زانستگەی “یو سی ئێل ئەی” کالیفۆڕنیای ئەمریکا، خولی فێرکاری ده‌رهێنه‌ری ته‌واو کرد و هەتا ئێستا ۷ کورته فیلم و ۱ فیلمی درێژخایەنی درووستکردووە و له هه‌ندێک فستیڤاڵه‌کانیشدا به‌شداری کردووه. ناهید قوبادی له کۆمه‌ڵێک فیلم وه‌کوو سکرتێر و کارداری سێن‌، هاریکاری ده‌رهێنه‌ر، ڕاوێژکار و به‌رنامەداڕێژ به‌شداری کردووه. هه‌روه‌ها له‌گه‌ڵ هاوسه‌ره‌که‌ی “بیژه‌ن زه‌مان پیرا” پێکه‌وه دەرهێنەری چەند فیلمیان کردووه‌ و چەند فیلمنامەیشیان پێکەوە نووسیوە.

قوبادی جگە لە درووستکردن فیلم، لە بواری شێعر و فۆتۆگرافیشدا چالاکی نواندووە و یەکەم کتێبی شێعری خۆی بە نێوی “ئێمە و غوربەتی مانگ”ی لە ساڵی 1373ی هەتاوی بڵاوکردەوە. هه‌روه‌ها له فیلمی “خه‌یاڵی با” به ده‌رهێنه‌ری “ئاره‌زوو مه‌حموودی” وه‌کوو ڕاوێژکاری ده‌رهێنه‌ر هاوکاری کردووە. قوبادی له فیلمی “نیوه‌ی مانگ” له ده‌رهێنانی به‌همه‌نی قوبادی وه‌کوو هاریکاری ئێدیتۆر له‌گه‌ڵ “هایده سه‌فی‌یاری” هاورکاری کردووە و هەروەها له فیلمی “کیسه‌ڵه‌کانیش ده‌فڕن” له ده‌رهێنانی به‌همه‌نی قوبادی، وه‌کوو سکرتێری سێن‌ به‌شداری کردووه.

فیلمە درێژخایەنەکان:

دەربارەی 111 کچ 2012

  • کورتەیەک لە چیرۆک: لە ناوچەیەکی دوورکەوتوو لە کوردستان 111 کچی لادێیی خەریکن لە باروودۆخێکی ناخۆشی سنوورداردا پیردەبن.
  • ئەوان هێشتا زەماوەنیان نەکردووە. باوکان و براکانیان، یان مردوون یان ونبوون. دۆزینەوەی پیاوی باش و هاتنیان بۆ ئەو ناوچە ئەستەمە. ئەوان داهاتووی خۆیان زۆر باش نابینن و هەربۆیە تێکڕا نامەیەک دەنێرن بۆ سەرۆک کۆمار و داوای یارمەتی لێدەکەن و دەڵێن ئەگەر بێتو تا چوار ڕۆژیتر وەڵامیان نەدەنەوە، هەموویان خۆیان لە کێوێک دەخەنە خوارەوە و خۆیان دەکوژن. بە فەرمانی سەرۆک کۆمار، کەسێکی پشکنەری تایبەت بە نێوی “دونیادیدە” لەگەڵ کوڕێکی منداڵ بە نێوی”شێرکۆ” بۆ پشکنین دەنێرنە ئەوێ.
  • سەفەری دواتری ئەوان لە تارانەوە بۆ گوندە چکۆلەکەی شێرکۆ لە کوردستانە. چیرۆکێکە دەربارەی، کوردێک و ئێرانییەک، سوننەیەک و شێعەیەک. ئەو دوانە لە هەوڵ دەبن بۆ ئەنجامدانی ئەو فەرمان و ئەرکە سەیرە. لە درێژەی ئەم سەفەرە سەیر و سەمەرە زۆر هەڵسووکەوتی جۆراوجۆر و سەیر لە خۆیان نیشان دەدەن. هەردووکیان قسەخۆش و پێکەنیناوین. چوار ڕۆژ سەفەر کردنی ئەوان دەبێتە هۆی ئەوەی بەرپرسیارانی دەوڵەتی بە خەبەر ببنەوە و هەروەها سەفەری سەرەکیشیان نەجاتدانی ئەو 111 کچەیە.
  • بەرهەم هێنان: کۆمپانیای مژفیلم
  • بەرهەم هێنەر و ئامادەکار: بەهمەن قوبادی، عەبباس غەزاڵی
  • دەرهێنەر: ناهید قوبادی و بیژەن زەمانپیرا
  • کاتی فیلم: 79 خولەک
  • بڵاوکردنەوەی جیهانی: مژفیلم
  • بڵاوکردنەوە لە کەنەدا و ئەمریکا: The Global Film Initiative
  • بەڕێوەبەری فیلم هەڵگرتنەوە: حەمید قەووامی
  • هاریکاری یەکەمی دەرهێنەر: جەلال ساعێدپەناه
  • هاریکاری دووهەمی دەرهێنەر: بێری شەڵماشی
  • دەنگ: حوسەین قورچیان
  • دیزاینەری دەنگ و میکس: بۆتان ئوقڵوو
  • مۆسیقا: نیکی میرزا
  • بەڕێوەبەری بەرهەمهێنان: سۆران ئیبراهیم
  • کۆردنەوە و تەدوین: بەهمەن قوبادی و نیعمەتوڵڵا نارنجی
  • ئەکتەرەکان: ڕەزا بهبوودی، مەهدی ساڵی و ئەمین سادقی
  • نەمایش لە فستیڤاڵەکان:
  • خەڵاتی باشترین فیلمی فستیڤاڵی پەن ئاسیا، لەندەن 2013
    بەشداری لە فستیڤاڵی نێودەوڵەتی فیلمی پووسان کۆریای باشوور، نوەمبەری 2012
    بەشداری لە فستیڤاڵی نێودەوڵەتی فیلمکسی ژاپۆن، دێسەمبەری 2012
    بەشداری لە فستیڤاڵی نێودەوڵەتی ڕتردامی پۆڵەندا، ژانوییەی 2013
    بەشداری لە فستیڤاڵی فیلمی کوردی لە لەندەن، سێپتەمبەری 2013
    بەشداری لە فستیڤاڵی نێودەوڵەتی پاڵم ئێسپرینگی ئەمریکا، ئۆکتۆبەری 2013
    بەشداری لە فستیڤاڵی نێودەوڵەتی کارلوووی‌واری کۆماری چێک، 2013
    بەشداری لە فستیڤاڵی نێودەوڵەتی گلۆباڵ لێنزی ئەمریکا، 2013
    بەشداری لە فستیڤاڵی نێودەوڵەتی فیلمی پووسان، خولی نوێی کێبەرکێکان، 2012
  • چالاکییەکانیتری ناهید قوبادی:
  • سکرتێری سێنی فیلمی (کیسەڵەکانیش دەفڕن)، بە دەرهێنەری بەهمەن قوبادی.
  • ڕاوێژکاری و فیلمنامەنووسی هاوبەشی لە گەڵ بیژەن زەمانپیرا لە فیلمی (ماڵە بێ پلاکەکان).

کورتە فیلمەکان:

مشک و پشیلە 2009

  • کورتەیەک لە چیرۆک: فیلمێکی دۆکۆمێنتارییە دەربارەی منداڵانی سنە، کە بۆ بەردەوامبوونی ژیانیان نانەڕەقەن کۆدەکەنەوە.
  • ئه‌وان ناچنە قوتابخانه و کار ده‌که‌ن تاکوو بتوانن پاره کۆ بکه‌نه‌وه و یارمه‌تی بنه‌ماڵه‌که‌یان بده‌ن. زۆر هه‌ژارن و بڕێکیان به بۆنه‌ی کاری زۆره‌وه نه‌خۆش دەکەون.
  • دەرهێنەر: ناهید قوبادی
  • کاتی فیلم: 26 خولەک
  • شێواز: دۆکۆمێنتاری
  • نەمایش لە فستیڤاڵەکان:
    خه‌ڵاتی باشترین دۆکومێنتاری فستیڤاڵی دی پوپولی فڵۆڕانس، ئیتالیا – ۲۰۰۸
    فستیڤاڵی فیلمی به‌رڵین، ئه‌ڵمانیا – ۲۰۱۰
    و فیلمی هه‌ڵبژێردراوی فستیڤاڵه‌کانی: مەنچستەر ( ئینگلاند)، کڕۆنا (ئیرلەند)، فستیڤاڵی شار (تاران)، خواردنه‌ ئه‌هۆه‌نه‌کان (ئیتالیا)، فیلمی له‌نده‌ن (ئینگلاند) فیلمی دۆکومێنتاری (مەدرید)، میلان (ئیتالیا)، مه‌یامه‌ی ئه‌مه‌ریکا، ویسکانسێن (ئه‌مه‌ریکا)

وڵاتەکەمان ئاوەدان بکەین 2006

  • کورتەیەک لە چیرۆک: کچێک دایکی فێری خوێنده‌واری ده‌کات، به‌ڵام هاوسه‌ری ژنه‌که ئه‌م شته‌ی پێ ناخۆشه و به ناچار کچه‌که به‌نهێنی خوێنده‌واری فێر ده‌کات.
  • ده‌رهێنه‌ر: ناهید قوبادی
  • کاتی فیلم: 14 خوله‌ک
  • شێواز: بە شێوەی چیرۆک
  • نەمایش له فستیڤاڵه‌کان:
  • فستیڤاڵی کورته فیلمی خوێنده‌واری تاران – ۱۳۸۴

لە پشت سێن (پشت صحنه) 2005

  • کورتەیەک لە چیرۆک: پیره‌ژنێک تەنیا مانگایێک و کوڕێکی گێژی هه‌یه‌ و ده‌بێت هه‌موو ڕۆژێک ڕێگایەکی دوور و درێژ بۆ لەوەڕاندنی مانگاکە ببڕێت . دوای گه‌ڕانه‌وەیشی شیره‌که‌ی دە‌دۆشێت و ماستی لێ درووست ده‌کات و ده‌یفرۆشێت به هاوسێکانی.
  • ده‌رهێنه‌ر: ناهید قوبادی
  • کاتی فیلم: 21 خوله‌ک
  • شێواز: بە شێوەی چیرۆک

دوایین تاوولەرز 2003

  • کورتەی چیرۆک: چیرۆکی پیرەپیاوێکی تەنیای ئاپاراتچی سینەمای سەرکراوەی شاری سنەیە. ده‌یه‌وێت به ڕێخستنی دووباره‌ی سینه‌ماکه خه‌ڵک هان بدات بۆ بینینی فیلم له‌و سینەما به‌ڵام که‌س پێشوازی لێ ناکات تا ئه‌وه‌یکه، فیلمی مردنی پیره‌مێرده‌که له‌سه‌ر پەردەی سینه‌ماکه ده‌بینین.
  • ده‌رهێنه‌ر: ناهید قوبادی
  • کاتی فیلم: 12 خوله‌ک
  • شێواز: چیرۆکی:
    نەمایش له فستیڤاڵه‌کان: کاندیدای باشترین فیلمی داستانی و ئایدیا داری فستیڤاڵی لۆس ئانجلێس، ئه‌مه‌ریکا ۲۰۰۷

بازنەی بەستراو 2002

  • کورتەیەک لە چیرۆک: چیرۆکی ژیانی کچێکە کە لە چاوەڕوانییەکی زۆردا بۆ هاتنەوەی هاوسەرکەی شێت دەبێت.
  • ده‌رهێنه‌ر: ناهید قوبادی
  • کاتی فیلم: 14 خوله‌ک
  • شێواز: بە شێوەی چیرۆک (داستانی)
  • نەمایش لە فستیڤاڵەکان:
    خەڵاتی باشترین ئەکتەری ژنی فستیڤاڵی نەینەوا لە سنە،2005
    خەڵاتی باشترین ئەکتەری ژنی فستیڤاڵی فیلمی سلێمانی لە کوردستانی باشوور، 2005
    بەشداری لە فستیڤاڵی کورتە فیلمی دیاربەکر لە باکووری کوردستان، 2004
    بەشداری لە فستیڤاڵی وارەشی بابول، 2002

بیانوویەکی سادە بۆ خۆشبەختی 2001

  • کورتەیەک لە چیرۆک: باسی کوڕێکی تازەلاوە کە بە کۆکردنەوە و فرۆشتنی شتە کۆنەکان بنەماڵەکەی بەخێو دەکات و بەو پارەی وا کۆی کردووەتۆ دیارییەک بۆ خوشکەکەی دەکڕێت.
  • دەرهێنەر: ناهید قوبادی
  • کاتی فیلم: 14 خولەک
  • شێواز: دۆکۆمێنتاری
  • نەمایش لە فستیڤاڵەکان:
    فستیڤاڵی نێودەوڵەتی تسالونیکی یۆنان لە ساڵی 2002
    فستیڤاڵی نێودەوڵەتی کورتە فیلمی لەندەن، ساڵی 2002
    فستیڤاڵی نێودەوڵەتی کورتە فیلمی بەرلین، ئاڵمان ساڵی 2004

سەفەری یەکەم 2001

  • کورتەیەک لە چیرۆک: پیرەپیاوێک دەچێت بۆ بینینی کوڕە سەربازەکەی، بەڵام هەردەگاتە سەربازخانەکە دەزانێت کە کوڕەکەی گەڕاوەتەوە بۆ ماڵەوە. بۆیە ئەویش سەفەرەکەی نیوەتەواو بە جێدێڵێت و دەگەڕێتەوە.
  • ده‌رهێنه‌ر: ناهید قوبادی
  • کاتی فیلم: ١٢ خوله‌ک
  • شێواز: بە شێوەی چیرۆکی (داستانی)
    نمایش له فستیڤاڵه‌کان: بەشداری لە کورتە فیلمی نەینەوا، لە سنە